Eksperti i sigurisë Faik Basha, plagosjen e dyfishtë natën e 12 marsit në Grudë të Shkodrës, ku u plagos Gjergj Ndërshtiqaj, i cili për dy vjet ka qenë dronist në polici, dhe ka filmuar sipërfaqe të tëra në Dukagjin, disa prej tyre të mbjella me kanabis dhe kunati i tij Gjon Nika, e sheh si ngjarje që vjen për shkak të detyrës së policit.
Nga një studio televizive, ai e cilësoi të rëndë faktin që efektivë të policisë të cilët kanë kryer një detyrë të caktuar në shërbim të shtetit, një grup njerëzish që kanë menduar për shkaqe të drejtpërdrejta në lidhje me detyrën e tij, të ngrënë dorë dhe të sulmojnë një punonjës policie.
“Kam qenë vetë me uniformë dhe drejtues uniforme dhe kam humbur një njeri të afërt që ka qenë në shërbim në Lazarat, bandat i drejtuan armën dhe i morën jetën. Është e rëndë.
Prisja që të kishte autorët në kërkim ose të arrestuar, të ketë një plan për përftimin e më shumë provave.
Atentati nuk është kryer për të ndaluar veprimtarinë, por hakmarrje për veprimet e kryera. Autorët mund të mendojnë se puna e kryer nga personi, mund t’u ketë bërë dëm.
Por një dronist nuk ka asgjë në dorë, veçse zbaton urdhrat. Në këtë mënyrë ka zbuluar parcela me hashash që mund të kenë qenë në pronësi të autorëve.
Ne e kemi parë si shiten informacioni për grupet kriminale dhe ka pasur pasoja të rënda dhe kur këto pasoja vijnë në drejtim të policisë e bëjnë akoma më të rëndë ngjarjen.
Kanë menduar të kryejnë një atentat ndaj punonjësit të cilin e cilësojnë si shkakun kryesor të prishjes së parcelës.
Nuk mendoj se autorët kanë qenë me pagesë, por personat e dëmtuar.
Autorët kanë pasur si synim ekzekutimin, kanë marrë masa të kenë municion të mjaftueshëm dhe është zgjedhur një vend që kanë menduar që nuk do u lejonte kohë as për tu përgjigjur dhe as për tu larguar.
Mendoj se kanë qenë autorë pa përvojë dhe kanë dështuar. Nga rënia në një pritë është e pamundur të shpëtosh, punonjësi i policisë ka bërë dhe një gabim.
Ka qëndruar gjatë pritës dhe nuk ka tentuar të largohet. Është fat i madh që ka shpëtuar.
Në prita mund të krijosh hapësira të nevojshme vetëm për tu larguar nga zjarri, jo të qëndrosh.
Fati ka bërë që të shpëtojnë se kanë qenë më shumë se 80 predha të qëlluara ndaj tyre.
Prita të tilla janë fatale, po të kishim pasur një grup me eksperiencë dhe gjakftohtë ata mund të ishin ekzekutuar tashmë.”