Adriatik BALLA
Trajneri i Kombëtares, Silvinjo, duket se nuk e ka humbur shpresën e një vendi të parë në grup në Ligën e Kombeve, e po ashtu një kualifikim të mundshëm në Botërorin e vitit 2026. Në një intervistë që dha për gazetarin Bledi Fevziu”: dy ditë më parë, Silvinjo zbuloi edhe disa episode nga Europiani i Gjermanisë dhe mënyrën se si ai e menaxhon grupin. Fillimisht ai komentoi humbjen 1-0 me Gjeorgjinë në “Air Albania” të martën në mbrëmje. “Stadiumi ishte plot dhe pritshmëritë tona ishin mjaft të mira për të fituar, mbase edhe për të barazuar. Është humbja e parë pas një viti e gjysmë është madje dhe goli i parë që kemi pësuar në stadiumin “Air Albania” dhe më vjen keq për këtë, por në futboll ndodh gjithçka. Gjithsesi futbollistët dhanë maksimumin. Në futboll ka humbje, ka fitore, sigurisht që deri tani kemi patur një bilanc pozitiv, por problemi ishte që skuadra nuk mundi të reagojë. Sipas meje duhej të ishte një barazim”, tha ai.
Pikëpyetjet e Europianit
Silvinjo foli edhe për paraqitjen e Shqipërisë në Europian, duke thënë se skuadra bëri të pamundurën në të tria ndeshjet, në një grup të fortë e të ndërlikuar. “Mendoj se bëmë të pamundurën përballë Italisë, Spanjës dhe Kroacisë në një grup mjaft të ndërlikuar e të vështirë. E mbaj mend mirë pasi i kemi parë të gjitha ndeshjet e EURO 2024 për të mësuar më shumë, edhe ne nuk është se luajtëm siç duhet me Italinë. Është çështje debutimi. Debutimi i parë është gjithmonë i vështirë, pasi nuk je mësuar të luash me atë nivel loje ndeshjet. Ndeshjet Europianit janë ndryshe, botërori dhe Europiani janë krejt ndryshe”, nënvizoi braziliani.
Mentaliteti fitues i Shqipërisë
Silvinjo nën drejtimin e tij ka mbjellë në skuadër një mentalitet fituesi. Ai e pranoi këtë dhe gjatë intervistës, duke thënë se flet vazhdimisht për lojtarët që ata të rrisin vetbesimin dhe puna ka ecur mirë. “Ne përpiqemi për këtë, mendoj që janë edhe statistikat. Unë mendoj se ka një limit e që mund të punohet, për shembull që kemi një vit e gjysmë që nuk humbasin në shtëpi, që nuk kemi pësuar as edhe një gol. Mendoj se këto janë të dhëna të rëndësishme. Kualifikimi në kampionatin europian, kur humb vetëm ndeshjen e parë me Poloninë, kjo do të thotë diçka. Kur fiton apo barazon, pra nuk humbet, unë mendoj se pas kësaj t’i dalëngadalë arrin të ndryshosh mentalitetin e lojtarëve. Edhe kjo është pjesë e procesit dhe e punës”, shtoi ai.
Asgjë personale me lojtarët
Silvinjo kujtoi dhe një herë se s’ka asgjë personale me lojtarët e Kombëtares. “U kam thënë lojtarëve, edhe në të gjitha konferencat e shtypit, kur pyetet për lojtarët, vetë lojtari duhet ta kuptojë që nuk e kam personale, kur e fus në kombëtare, nuk është se njëri më pëlqen më shumë apo tjetri më pak. Ky është futboll, në kombëtare thërritesh, nuk kemi të bëjmë me një shoqëri që t’i ecën me 23 lojtarë gjithë vitin. Dua të them nuk e kam personale me ta, mua më duhet të marr përsipër që ta sjell apo jo në kombëtare një lojtar, më pas janë tre milionë veta të tjerë që thonë se çfarë duhet bërë”, përfundoi ai.