Pas imazhit të mjekut dhe besimtarit mysliman, fshihej një bashkëpunëtor i krimit
Dervish Hasi, me profesion mjek kardiokirurg, ra në prangat e policisë ditën e sotme, nën akuzë për abuzimin seksual dhe shfrytëzimin për prostitucion të një të mitur 16-vjeçare.
Prej vitesh, Hasi punonte në spitalin “Shefqet Ndroqi”, teksa në vitin 2021 ai rezultoi të jetë pjesë e grupit të mjekëve që organizuan operacionin e parë në zemër në këtë spital. Ai shfaqej po ashtu si një besimtar i përkushtuar mysliman, megjithatë, duket se e gjitha kjo ishte një “maskë” perfekte, që i shërbente Hasit për të fshehur të gjithë aktivitetin kriminal ku ai ishte i përfshirë.
Ky aktivitet kriminal kishte nisur të linte gjurmë, duke rënë dhe në sy të policisë, teksa rasti i parë ishte ai i ndodhur në 22 janar, të vitit 2019.
Në atë ditë, Dervish Hasit do i hidhej në erë makina të cilën e kishte të parkuar në rrugën “Belul Hatibi”. Ngjarja ndodhi rreth orës 20:40. Policia sqaron se makina tip “Benz ML” me targa AA 441 OO, ishte në pronësi të Dervish Hasit.
Pas kësaj ngjarjeje, mjeku u vendos nënë hetim edhe nga Prokuroria e Posaçme kundër Korrupsionit dhe Krimit të Organizuar (SPAK), pasi ishte dyshime se Hasa ishte i përfshirë në grupin që furnizonte me tritol dhe armë snajper, kriminelë brenda dhe jashtë vendit.
Në atë kohë, Dervish Hasi dhe roli i tij dolën në dritë falë dëshmisë së bashkëpunëtorit të drejtësisë, Enver Jamaku. Ky i fundit ka treguar se në një rast ka qenë ai vetë që i ka çuar armët në shtëpinë e kirurgut. Rrëfimi i Enver Jamakut çoi disa persona në pranga dhe zbuloi 18 baza armatimi në Tiranë.
Sa i përket arrestimit të tij për shfrytëzimin e 16-vjeçares, policia ra në gjurmët e Hasit pas një denoncimi nga një person, që raportoi se e mitura abuzohej seksualisht. Prej dy vitesh, e mitura ishte larguar nga shtëpia e saj dhe shkonte në banesën e mjekut, i cili e prezantonte atë si gruan e tij të katër, pasi kishte edhe 3 bashkëshorte të tjera në shtëpi. Ai kishte arritur ta joshte me anë të besimit dhe duke i thënë se do martohej me të.
Megjithatë, Hasi të miturën e shfrytëzonte për prostitucion, duke e detyruar që të kryente marrëdhënie seksuale, madje edhe në grup. Gjatë periudhës 2-vjeçare, është kryer mërrëdhënie seksuale rregullisht me të miturën. Në këtë ngjarje janë të përfshira edhe 3 gratë e tjera të Hasit, të cilat ishin në dijeni të abuzimit që i bëhej të miturës.
Nga ana tjetër, nga sekuestrimi i aparatit celular që mjeku zotëronte, policia zbuloi një grup ku shkëmbeheshin mesazhe dhe video pornografike, që ai prodhonte kur abuzohej e mitura. Në këtë grup ishin edhe 3 persona të tjerë.