Piktori i njohur Ali Oseku, një prej artistëve më emblematik të artit shqiptar në 50 vitet e fundit u nda nga jeta në moshën 80-vjeçare pas një sëmundje të rëndë. Ali Oseku ishte një nga piktorët e rëndësishëm bashkëkohorë shqiptarë, që për kolegët dhe miqtë largimi i tij është humbje e madhe për artin tonë. Artisti Ardian Isufi shprehet se Ali Oseku ishte një shpirt i lirë artisti. “U shua një simbol i artit, Ali Oseku. Burrë fisnik. Shpirt i lirë artisti, që nuk e përkuli diktatura komuniste”, shprehet Isufi.
Oltsen Gripshi mik dhe studiues i pikturës së Ali Osekut, thotë se sa herë e shikon një portret të tij të realizuar nga mjeshtri Ali Osku në studio, aq herë bindet për madhështinë e tij si artist. “Një artist, i cili tejshkoi kohën dhe hapësirën me artin e tij, duke rrezatuar për atë që përfaqëson në historinë e pikturës shqiptare. Ali Oseku solli në pikturën shqiptare një mënyrë të re vrojtimi në marrëdhënie me natyrën”, thotë Gripshi. Sipas, Gripshit kjo ishte një marrëdhënie, e cila nxori në plan të parë disa aspekte të rëndësishme mbi mënyrën dhe përqasjen se si ai e trajtoi zhanrin e peizazhit në veçanti, me aq origjinalitet dhe ndjenjë.
“Aspekte të cilat shkojnë nga thjeshtimi i formave, vëllimeve, pastërtisë së ngjyrave, zbrazjes së peizazhit nga prania e figurës njerëzore dhe çdo elementi tjetër realist, gjë, që shkon në analogji semiotike dhe simbolike me pikturën e Mark Rothko-s. Piktura e Ali Osekut ripërtëriti ndjesinë e lirisë mbi sipërfaqen e kanavacës, duke na përfshirë ne vëzhguesve të artit të tij në një hapësirë pa kufij, brenda secilës ai mbyti ankthet, frikat, ndrojtjet, vuajtjet dhe vegimet e kujtimeve të së shkuarës komuniste të cilat pas viteve ‘90 i shndërrojë ato në livadhe plot ngjyra të shpirtit të tij krijues”, thotë artisti Oltsen Gripshi.
Të mërkurën u kryen homazhe në Universitetin e Arteve në nder të piktorit të njohur. Piktori Petraq Papa u shpreh se Ali Oseku ishte një personazh shumë i realizuar. “Një prej ikonave të artit shqiptar që të gjithë ja njohin kontributin”, tha piktori Papa. Ndërsa piktori Gazmend Leka e vlerësoi Ali Osekun si njeri, por dhe si artist. “Më ka bërë shumë përshtypje që dhe në momentet më të vështira nuk e ka tradhtuar kurrë veten e vet dhe shoqërinë e vet”, tha Leka. Një ditë më parë edhe Atelie Grafika – Universiteti i Arteve Tiranë shprehu respektin e veçantë për prof. Ali Osekun. “Lider për shumë vite i programeve të studimit Grafika – Bachelor&Master me kontribute të jashtëzakonshme në mësimdhënie dhe edukimin e brezave të rinj”, shprehet kjo atelie.
Studimet dhe krijimtaria
Piktori i njohur Ali Oseku (1944-2024) u nda nga jeta mbrëmjen e së martës në banesën e tij në Tiranë. Kreu Liceun Artistik “Jordan Misja” për pikturë dhe ndoqi studimet e u diplomua në Institutin e Lartë të Arteve (1969). Pas studimeve, artisti fillon punë si skenograf në Teatrin e Operës dhe Baletit. Në vitin 1973, në valën e ndëshkimeve shtetërore në fushën e artit dhe kulturës, artisti dënohet me burg deri në vitin 1979. Pas kësaj periudhe, artisti punon si punëtor i thjeshtë, deri në rënien e sistemit. Pas viteve ’90, do ishte një nga zërat më aktivë të skenës artistike vendase. Në vitin 1991 u rikthye në veprimtarinë artistike si piktor në Galerinë Kombëtare të Arteve, njëkohësisht pedagog i jashtëm i pikturës në Akademinë e Arteve, ku kaloi në 1998 si përgjegjës i ateliesë së grafikës. Ali Oseku ka marrë pjesë në ekspozita të përbashkëta dhe ka hapur disa ekspozita vetjake brenda vendit, si dhe në shtetet Belgjikë, Gjermani, Austri, Turqi, Kroaci, Poloni, Itali, SHBA, Greqi, Francë, etj. Gjatë periudhës 1998-2007 ndër të tjera Ali Oseku ka realizuar ciklin : “Gjurmët”, “Kërpudhat”, “Shiu”, “Rrugëve”, “Hapësirë”, etj. Ali Oseku është fitues i disa çmimeve.