Kryeminsitri Edi Rama ndodhet sot në Luksemburg, ku ka zhvilluar edhe një takim me komunitetin shqiptar që ndodhet aty.
Një ndër temat e diskutuara ishte dhe vota e emigrantëve, një çështje për të cilën qeveria duhet ta realizojë sipas vendimit të Gjykatës Kushtetuese. Megjithatë, Rama u shpreh se kjo është një nismë që ende nuk mund të realizohet, pasi qeveria nuk ka të dhënat e nevojshme të emigrantëve shqiptarë.
“Sa i takon votës së emigrantëve nuk është çështje dëshire apo vullneti se ne duam por është çështje e bazës së të dhënave. Nuk kemi akoma sot një regjistër të popullsisë në emigracion, edhe pse kemi bërë disa tentative. Nuk kemi arritur sepse siç jemi ne shqiptarët kur vjen puna edhe për të bërë pasaportën apo kartën e identitetit shkojmë e bëjmë atë ditë që na duhet. Çështja e databazës na pengon shumë për të bërë votën e emigtanëve.”– tha Rama.