Julian Meçaj është arrestuar së fundmi në Dubai të Emirateve të Bashkuara Arabe.
Ai ishte shpallur në kërkim, pasi dyshohet se mund të jetë një nga porositësit e atentatit ndaj Prokurorit Arjan Ndoja. Për këtë ngjarje ai është marrë në pyetje, por më pas është lënë i lirë, nga ku dhe përfitoi për t’u arratisur.
Meçaj është numri 2 i bandës së Durrësit, roli dhe ndikimi i të cilët u zbulua edhe më në detaje pas arrestimit të Adriatik Colit, një nga anëtaret e bandës. Ai njihet po ashtu si mik i afërt i Plarent Dervishajt, gjithashtu në kërkim për atentatin ndaj Ndoja.
Më 20 qershor të 2019 Julian Meçajt dhe Dervishajt iu bë një atentat në autostradën Tiranë-Durrës, ku si pasojë mbetën të plagosur të dy. Plarent Dervishaj, 47 vjeç, është kunati i Lul Berishës, ndërsa 36-vjeçari Meçaj është anëtari i bandës së tij, bandës së Durrësit.
Ngjarja ndodhi në zonën e ish-kënetës, pranë mbikalimit të Shkozetit, në Durrës, ku dy të plagosurit ishin duke hipur në makinën e Dervishajt. Meçaj mori tre plumba në trup, ndërsa Plarent Dervishaj morri një plumb në këmbë.
Brenda makinës tip “Range Rover” ishte edhe Bashkim Haxhija, mik i tyre, i vetmi i arrestuar për këtë ngjarje pasi akuzohet se qëlloi me armë në drejtim të autorëve.