Është arrestuar autori i dyshuar i vrasjes së shqiptarit 27-vjeçar Bajram Luli, në Londër. Sipas policisë metropolitane londineze, në pranga është vënë 31-vjeçari Sabin Manda. Pas krimit, policia publikoi foton e shqiptarit që dyshohet se kreu krimin.
“Ky është një imazh shumë i qartë dhe do të dëshiroja që kushdo që e njeh këtë njeri të kontaktojë menjëherë policinë.”– thuhej në njoftimin e policisë në atë kohë.
Kujtojmë se Bajram Luli u godit për vdekje brenda makinës së tij dhe nga plagët e marra humbi jetën spital, ngjarje e ndodhur më 13 mars. Luli ishte me origjinë nga Peqini dhe kishte pak kohë që kishte mbërritur në shtetin ishull. Dyshohet se ai është vrarë për shkak të një basti ku ka fituar 6 mijë paund dhe më pas ka pasur një sherr me persona të tjerë.