Teksa e gjithë vëmendja e tifozëve të futbollit është kthyer nga Euro 2024, në anën tjetër, klubet kanë nisur të luajnë ndeshjet e turit të parë kualifikues për në Champion League.
Ditën e djeshme Egnatia, kampione e Shqipërisë, u përball me skuadrën nga Bosnja-Hercegovina, Borac Banja Luka, në një ndeshje ku më shumë mbizotëroi politika dhe skandali.
Kampionët e Shqipërisë e panë veten në një situatë absurde që në fillimin e ndeshjes, me thirrjet antishqiptare që vërshuan në stadium. Thirrjet “Kosova është zemra e Serbisë” këndoheshin në kor nga tifozët ekstremistë pro-serbë të klubit boshnjak, të cilët shpalosën dhe një flamur ku ishte harta e Kosovës me ngjyrat e Serbisë.
Megjithatë, Egnatia e mbajti portën të paprekur në 45 minutat e para dhe bëri një paraqitje të mirë. Në minutën e 58-të mesfushori Zejnullai u ndëshkua me karton të kuq, dhe kjo duket se u dha më shumë “zemër” tifozëve huliganë.
Thirrjet antishqiptare u bënë më të shpeshta, e kjo detyroi arbitrin polak Stefanski të ndërpriste ndeshjen për afro dhjetë minuta dhe ndeshja rinisi vetëm me premtimin e se nuk ketë më të tilla episode.
Në minutën e gjashtë shtesë duhej Hrejla që të zhbllokonte ndeshjen për Borac, ndërsa tensioni në fund bëri që Ndreca të linte fushën me një tjetër karton të kuq për rrogozhinasit.
Tanimë Egnatia ka edhe ndeshjen e kthimit në datën 17 korrik në “Elbasan Arena”, ku synon kalimin më tej kjo edhe falë formës së mirë të treguar nga djemtë e Edlir Tetovës.