Kryetari i Partisë së Lirisë, Ilir Meta thotë se çështja e Sali Berishës është politike, e porositur nga Rama për të diktuar opozitën.
Në një deklaratë për mediat nga Fieri, ku zhvilloi edhe një takim me strukturat e PL, Meta deklaroi se protesta e 20 shkurtit dha një mesazh të fuqishëm. Sipas tij, përpjekjet e kryeministrit Rama për të shkatërruar pluralizmin politik janë të pashpresë.
Shumë shpejt – tha Meta – do të vendoset rendi kushtetues në vend dhe të gjithë do të mbajnë përgjegjësi për shkeljet e kushtetutës.
Pyetje: Seanca për Berishën është shtyrë sot, si e parashikoni fatin e tij, duke qenë se jeni aleat i ngushtë i tij?
Ilir Meta: Pak ditë më parë u mor një vendim absurd ndaj zotit Beleri. Për sa i përket zotit Berisha, kjo është një çështje 1000% politike, e urdhëruar nga Rama, me qëllim izolimin e tij me shpresën për të diktuar dinamikën brenda kampit opozitar dhe për të nxitur përçarje. Por tubimi i 20 shkurtit dha një mesazh të fuqishëm dhe absolutisht përpjekjet e tij për të shkatërruar pluralizmin politik janë të pashpresë.
Shumë shpejt në vend do të vendoset rendi kushtetues dhe të gjithë do të mbajnë përgjegjësi për shkeljet e kushtetutës dhe nëpërkëmbjen e qytetarëve shqiptarë.
Për sa i përket votës së emigrantëve, Meta tha se Rama është tmerruar nga kjo, por theksoi se PL do të bëjë të gjitha përpjekjet për të mundësuar votën e shqiptarëve që jetojnë jashtë.
“PL ka qenë dhe është e vendosur të votojë për emigrantët. Ai që është tmerruar është Edi Rama. Ne do të bëjmë të gjitha përpjekjet me mundësitë tona që ta kenë këtë mundësi, ta hedhin votën aty ku janë”, tha Ilir Meta.