Liam Osmani u bë mbrëmjen e djeshme pjesë e shtëpisë më të famshme në Shqipëri, “Big Brother VIP 3”, por që rrugëtimi i tij përfundoi ditën e sotme.
Kjo për shkak se strukturat e Forcës së Posaçme për Operacionet Speciale dhe Kërkimin bënë ndalimin e 44-vjeçarit, teksa ai ndodhej pikërisht në shtëpinë e BB VIP.
“Prokuroria e Tiranës, më datë 09.05.2022, ka dërguar urdhërin për ekzekutimin e vendimit penal të datës 23.02.2022, për dënimin e këtij shtetasi me 2 vjet e 6 muaj burgim për veprën penale “Mashtrimi”.
Ky shtetas, në vitin 2019, nëpërmjet mashtrimit, ka përvetësuar 17 bileta turistike për në Gjermani, për të cilat nuk ka kryer pagesat përkatëse.
Materialet i kaluan Prokuroris pranë Gjykatës Shkallës së Parë të Juridiksionit të Përgjithshëm Tiranë, për veprime të mëtejshme procedurale”, thuhet në njoftimin e policisë.
Për këtë janë njoftuar pak më parë edhe banorët e tjerë përmes një zarfi të kuq që ka hyrë në shtëpi.
“Banorë, Vëllai i Madh ka një njoftim të rëndësishëm për t’ju dhënë. Liami, sot paradite është shoqëruar nga Policia e Shtetit, për veprime të mëtejshme të procedurale në lidhje me një vendim të prokurorisë dhe gjykatës, që e ka dënuar Liamin Osmanin, i cili përmes mashtrimit ka mashtruar një agjenci duke i marrë 17 bileta turistike për në Gjermani dhe nuk ka kryer pagesat përkatëse. Ai nuk do të kthehet më, pasi do të vijojë me procedurat”, thuhet në njoftimin e Vëllait të Madh.