Gazetari Sokol Bregu ishte i ftuar sot në “Breaking” në Top News, ku ka dhënë detaje të reja mbi ngjarjen e rëndë të ndodhur në Dropull, ku dy të moshuarit Kosta dhe Kleoniqi Ilia u gjetën të vdekur në shtëpi.
Sipas gazetarit, kemi të bëjmë me një vrasje, nisur dhe nga kushtet në të cilat u gjetën dy të moshuarit. Ai shtoi se autori është një person që i njeh mirë të moshuarit.
“Mendoj se kemi të bëjmë me vrasje, edhe hetimet që po kryhen deri tani nga policia janë për vrasje. Mendohet se është kryer nga një person që i njeh. Janë shoqëruar 3 persona të tillë, besoj se për një prej tyre Prokuroria po punon për të gjetur prova që e lidhin me ngjarjen. Ka disa prova të lëna në vendngjarje. Gjithçka lidhjet me një goditje nga një person i tretë. Policia ka një dyshim por ende nuk po e provon shkencërisht se ai është personi që e ka kryer krimin.
Trupat janë gjetur me vonese sepse nuk kishin njerëz të tjerë kishin vetëm një të afërme që i telefononte. Unë kam folur me dikë nga grupi hetimor dhe dihet që është vrasje, është çështje ditësh para se të dalë me një të arrestuar.
Duke parë forcën dhe thellësinë e plagëve të shkaktuara, policia dyshon që është shkaktuar nga një person i tretë. Në këtë rast, nuk janë prishur as provat në vendngjarje pasi nuk është prekur asgjë në shtëpi dhe kjo do jetë ndihmë e madhe për zbardhjen.”– tha gazetari.