Një adoleshent që nuk i kishte mbushur ende 18 vjeç vendosi të marrë gjakun e babait të tij që u vra kur ai ishte në moshën 4-vjeçare.
Ngjarja e rëndë u regjistrua në fshatin Manati të Lezhës dhe krimi ka sfond gjakmarrjeje.
Një 65-vjeçar u ekzekutua me armë zjarri nga një i mitur, të cilit vëllai i tij i ka vrarë babanë në vitin 2009.
VRASJA
Ngjarja ndodhi rreth orës 12:00 të së hënës në fshatin Manati, ndërsa viktima është shtetasi Lek Lekgjonaj, banues në këtë fshat.
I moshuari u qëllua me pistoletë, sapo zbriti nga automjeti tip “Ford” brenda oborrit të shtëpisë së vëllait të tij.
Katër plumba e prekën në organet jetësore, duke i shkaktuar vdekjen e menjëhershme, ndërsa autori u prangos nga Policia disa minuta pas ngjarjes, si dhe u sekuestrua arma e krimit, një pistolete me mulli.
Autor është 17-vjeçari Florian Përvathi, banues në fshatin Manati dhe krimin ka deklaruar se e ka kryer në shenjë hakmarrjeje, pasi vëllai i viktimës i kishte vrarë babanë kur ishte vetëm 4 vjeç.
Referuar dinamikës së ngjarjes, bëhet me dije se adoleshenti e ka planifikuar mirë vrasjen.
Ai ka hyrë në këmbë brenda oborrit të shtëpisë dhe sapo 65-vjeçari ka zbritur nga makina, ka qëlluar në drejtim të tij.
Pasi ka rënë në tokë, ai e ka qëlluar edhe njëherë pas shpine dhe kur është bindur se ka vdekur, është larguar nga vendi i ngjarjes me një automjet tip “Audi” që e priste në rrugën kryesore.
Shtëpia ku ndodhi krimi ishte e vëllait të viktimës, i cili kishte kryer vrasje dhe aty nuk jetonte njeri.
Për ngjarjen e rëndë, Policia lokale e Lezhës u njoftua nga banorë të zonës. Blutë u vunë menjëherë në lëvizje, duke bërë të mundur që brenda një kohë të shpejtë të neutralizojnë e të prangosin autorin e dyshuar të vrasjes, pikërisht 17-vjeçarin.