Prokuroria në Itali ka nisur hetimet për zbardhjen e vdekjes së 23-vjeçarit shqiptar Sami Macakulli. I riu me origjinë nga Dibra humbi jetën më 13 qershor pasi u rrëzua nga maja e një shtylle të tensionit të lartë në via Padana Superiore në Castegnato. Prokurori ka hapur një hetim për vrasje nga pakujdesia dhe ka futur në regjistrin e të dyshuarve pronarin e kompanisë në emër të së cilës punonte viktima, Coget Impianti nga Corteno Golgi.
I riu, një shqiptar me banim në Caorle, në rajonin e Venetos, po kryente punë mirëmbajtjeje në një lartësi në rrjetin elektrik Terna kur u rrëzua. Ai së bashku me kolegët e tjerë zëvendësoi një tel për të mbrojtur shtyllën, një punë rutinë, kur pajisja e sigurisë që duhej ta mbronte në rast të humbjes së ekuilibrit u thye dhe ai papritur u rrëzua nga një lartësi prej 45 metrash.
Rrëzimi ishte i frikshëm, pasi shqiptari fillimisht përfundoi në një gardh, të cilin e theu dhe në fund u rrëzua përtokë.
Prokurorja Lisa Saccaro tani synon të hedhë dritë mbi detajet e punës dhe mjetet mbrojtëse të mbajtura nga punëtorët gjatë punës së tyre, për të kuptuar pse 23-vjeçari u rrëzua dhe nëse ishte siguruar ashtu siç duhet.