Ligji i ri për industrinë ushtarake ka hyrë në fuqi në Shqipëri, duke e hapur rrugën për modernizimin dhe rivitalizimin e kapaciteteve të trashëguara të këtij sektori në vend. Ky ligj synon të adresojë aspekte të shumta të industrisë, duke përfshirë teknologjinë, operativitetin, si dhe aspekte ligjore, financiare, ekonomike, sociale dhe ambientale, përmes bashkëpunimit të ngushtë me sektorin privat.
Në kuadër të këtij ligji, janë identifikuar tre uzina kryesore që do të transformohen për të ringritur industrinë ushtarake në Shqipëri:
Kombinati mekanik i Poliçanit për prodhimin e municioneve.
Uzinë mekanike e Gramshit për armatimin.
Uzinë e Mjekësit për eksplozivët.
Ministri i Mbrojtjes, Pirro Vengu, vizitoi një ditë më parë uzinën e Mjekësit në Elbasan. Gjatë vizitës, ai theksoi se ligji i ri do të sigurojë investime të konsiderueshme për transformimin e kësaj uzine dhe gjithashtu do të adresojë shlyerjen e detyrimeve të papaguara ndaj punonjësve.
Në samitin e NATO-s të mbajtur në Lituani një vit më parë, u theksua rëndësia e një industrie të fuqishme të mbrojtjes, një nevojë që është bërë edhe më e dukshme pas fillimit të luftës në Ukrainë.