Mjeku Edmond Gashi dyshohet se është “koka” e skemës skandaloze të ngritur në spitalin onkologjik në QSUT, në kurriz të pacientëve me kancer.
Ai sot u la në masën e sigurisë “arrest shtëpie” nga GJKKO, teksa pas daljes nga Gjykata, nuk pati guxim të përballej me gazetarët, por u largua nga dera e pasme. Duket se nuk ka asnjë shenjë pendese pas gjithë këtij skandali, edhe kjo vërtetohet nga reagimet e familjarëve të Gashit.
Vajza e mjekut ka replikuar dhe ironizuar qytetarët në komente në rrjetet sociale, pavarësisht se babai i saj është nën akuzë.
Edmond Gashi është nën hetim nga Prokuroria e Tiranës pasi akuzohet se dërgonte pacientët me kancer nga spitali i Onkologjikut tek klinika e tij private “Megis”. Skandali u bë publik ditën e djeshme pas dyshimeve të ngritura nga SPAK se në spitalin Onkologjik të QSUT-së, bëhen pazare me jetët e pacientëve me kancer. Mjekë e punonjës të tjerë janë përfshirë në një skemë abuzive, ku dyshohet se pacientët e sëmurë me kancer nuk merrnin shërbim në spitalin shtetëror, por dërgoheshin në klinikat private dhe spitalet private ku punonin mjekët. Aty ata detyroheshin të paguanin shuma të mëdha për të marrë shërbimin e kimioterapisë apo dhe operacione.