Situata me zjarret në Shëngjin vijon të jetë alarmante, teksa janë aktivizuar disa vatra të reja.
Zjarri është pranë banesave, ku rrezikohen disa prej tyre, e shumë pranë ndodhet dhe një pikë karburanti. Po ashtu është rritur gatishmëria pranë portit, për shkak të cisternave të gazit.
Sakaq, gjatë pasdites së kësaj të marte, është ndërhyrë edhe nga ajri me helikopterin e ushtrisë “Cougar” ndërsa nga Italia kanë mbërritur dy avionë të tjerë, të cilët do të asistojnë në vënien e situatës nën kontroll.
Mali i Shëngjinit vijon të jetë i pushtuar nga flakët dhe tymi, ndërsa pushuesit dhe turistët kanë braktisur bregdetin, vetëm disa prej tyre vijojnë të pashqetësuar të bëjnë plazh apo të ecin në breg të detit.