Një tjetër rast dhune në familje është zbardhur ditën e sotme, teksa një 50-vjeçar është arrestuar në Vaun e Dejës.
Mësohet se 50-vjeçari dhunoi bashkëshorten dhe 4 fëmijët e tyre të mitur. Ai raportohet se i ka kërcënuar me thikë që prej mbrëmjes së djeshme. Policia ka sekuestruar thikën dhe një sëpatë që u gjet në shtëpi, teksa 50-vjeçari u arrestua.
Kujtojmë se në Tiranë një 35-vjeçar u arrestua, pasi prej kohësh dhunonte bashkëshorten, nënën dhe vajzën e tij të mitur, duke i mbyllur brenda në shtëpi dhe duke mos i lejuar të kishin kontakt me njeri tjetër.
Njoftimi i policisë:
Dhunoi bashkëshorten dhe 4 fëmijët e tyre të mitur, si dhe i kanosi ata për jetën, me mjete prerëse, kapet në flagrancë dhe vihet në pranga 50-vjeçari. Sekuestrohen 2 mjete prerëse (sëpatë dhe thikë).
Pas marrjes së njoftimit, mbrëmjen e djeshme, se një shtetas dhunonte dhe kanoste, bashkëshorten dhe 4 fëmijët e mitur, në banesën e tyre, në fshatin Toplane, shërbimet e Komisariatit të Policisë Vau i Dejës kanë organizuar punën dhe kanë shkuar në vendngjarje.
Si rezultat është kapur në flagrancë dhe është vënë në pranga autori i rastit, shtetasi P. L., 50 vjeç. Gjithashtu, janë sekuestruar në cilësinë e provës materiale, 2 mjete prerëse (sëpatë dhe thikë), me të cilat i arrestuari kanoste për jetën, bashkëshorten dhe fëmijët.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme.