Qeveria britanike duket se do të nisë një “luftë” kundër shqiptarëve, të cilët mbërrijnë ilegalisht në Mbretërinë e Bashkuar.
“Daily Mail” i ka kushtuar një analizë masave që po diskutohen nga Rishi Sunak dhe parlamenti, ndërsa përflitet se një ndër masat mund të jetë dërgimi i shqiptarëve drejt Evropës Lindore, menjëherë në momentin e mbërritjes në Angli. Por gjithashtu, edhe depërtimi mbrapsht në vendin tonë.
Një tjetër propozim që po shqyrtohet është një ashpërsim i Aktit të Skllavërisë Moderne, për të cilin ministrat thonë se është bërë ‘zbrazëtia më e madhe’ në sistemin e emigracionit. Shifrat e Home Office tregojnë se numri i emigrantëve shqiptarë që pretendojnë se janë viktima të skllavërisë moderne do të dyfishohet këtë vit në rreth 5000 të tillë.
Aktualisht, ligji parashikon që emigrantët pa të drejtë qëndrimi të dërgohen në hotele të përcaktuar, në vende si Ruanda, të cilët paguhen nga qytetarët britanikë. Kjo e ka vendosur qeverinë në një presion tepër të madh, teksa kriza e emigrantëve vazhdon e shtohet.
Robert Jenrick, ministri i imigracionit, tha dje se qeveria do të punojë në një sistem ‘të shpejtë’ për të përshpejtuar largimin e emigrantëve pa të drejtë qëndrimi në Britani. Ai tha se një marrëveshje e nënshkruar vitin e kaluar kishte çuar tashmë në kthimin e 1,000 shqiptarëve, por këmbënguli se donte të shihte ‘shumë më shumë’ të kthyer në muajt e ardhshëm.
Sekretari i Transportit Mark Harper tha se presioni intensiv në qendrën e përpunimit të emigrantëve Manston nuk do të zgjidhet shpejt.
Ai i tha Sky News se puna ishte duke vazhduar për të larguar emigrantët nga vendi më shpejt, por tha se “është e arsyeshme të thuhet se nuk do të ndodhë brenda natës”.