Të tjera detaje janë zbardhur nga ngjarja e rëndë e ndodhur në Dhërmi, ku Gerald Shehu dyshohet se ka vrarë 31-vjeçarin, Eraldo Novruzi.
Policia bën me dije se Shehu ka qenë bashkëpronar i hotelit ku 31-vjeçari punonte si recepsionist. Krimi i rëndë dyshohet se ka ndodhur brenda hotelit, ku fillimisht ai e ka dhunuar të riun, e më pas nga pamjet filmike që policia zotëron, shihet se e qëllon me armë. Ai po ashtu dyshohet se e ka transportuar vetë trupin e të ndjerit, duke e zhdukur. Më pas, është larguar drejt Greqisë nga pika kufitare e Qafë Botës.
Njoftimi i policisë:
Himarë/Informacion shtesë
Në vijim të veprimeve intensive që po kryen grupi hetimor, në drejtimin e Prokurorisë, për gjetjen e shtetasit E. N., si dhe për zbardhjen e rrethanave dhe dokumentimin e plotë ligjor të rastit, sqarojmë se nga kontrollet e deritanishme nuk është bërë ende e mundur gjetja e shtetasit E. N.
Policia e Shtetit ka shpallur në kërkim autorin e dyshuar, shtetasin G. Sh. (bashkëpronar i hotelit ku punonte shtetasi E. N.) dhe po bashkëpunon me Policinë greke për të bërë të mundur lokalizimin dhe kapjen e tij, pasi nga hetimet e deritanishme, pamjet filmike të sekuestruara dhe dëshmitë e marra, dyshohet se shtetasi G. Sh. ka qëlluar me armë zjarri ndaj shtetasit E. N.
Policia e Shtetit vë në dispozicion foton e autorit të dyshuar, e cila i është vënë në dispozicion edhe Policisë greke dhe partnerëve të vendeve të rajonit.