Mbrëmjen e sotme në tiranë po mbahet protesta pë vrasjen barbare të Egli Progës në Pogradec. Mijëra qytetarë kanë marrë pjesë në tubim me pankarta nëpër duar. Slogani kryesor që ata kanë zgjedhur është “Kundër gangove në pushtet”.
Protestuesit mbajnë në duar foton e Egli Progës, por edhe pankarta të ndryshme si “A fshihet e vërteta?”, “Kërkojmë drejtësi” etj. Ky tubim do të mbahet nga sheshi “Skënderbej” deri te Kryeministria. Qytetarët kanë nisur nga sheshi drejt kryeministrise ndërsa mbajnë një pankartë të madhe ku shkruhet “Kundër gangove me pushtet”.
Gjithashtu të pranishëm janë edhe familjarët e tij dhe motra e 42-vjeçarit e cila ka ngritur akuza të forta dhe të rënda ndaj autoriteteve të policisë dhe shërbimit të urgjencës duke thënë se e mbuluan krimin dhe u munduan ta fshihnin. Në protestë ajo ka ngritur zërin për të folur.
“Prokuroria, gjykata dhe policia ta dëgjojnë mirë. Egli u vra nga 4 kriminelë në bashkëpunim me njëri-tjetrin. Unë nuk akuzoj pa bazë vetëm sepse më ka vdekur vëllai me të cilin u rrita. I thashë prokurores se nuk mund ta bëjë drejtësinë e vëllait tim. Ai u qëllua nga 4 barbarë. Njëri prej tyre u dorëzua në formë të kontrolluar, të tjerët kanë 9 ditë që pinë raki. Kjo është drejtësia? Prokurorja që la barbarët të pinë raki u hoq nga çështja pas kërkesës sime.
Horri që ka marrë përispër vrasjen është organizuar që ta marrë ai që të shpëtojnë të tjerët. Ky maskara kur u dorëzua në polici tha se Eglin nuk e preku fare me dorë. Nuk ka dëshmitarë, kamera. Përse u dorëzua kur nuk ka prova? Sepse thanë se Egli vdiq nga pija? Një nga vrasësit e vëllait tim fjeti gjumë dhe thirri avokatin për t’u dorëzuar. Ky maskara tha se Egli vdiq vetë, nuk e preku me dorë. Policia e pa për 30 minuta që lëngonte në rrugë dhe nuk e prekën me dorë. Maskarai që e vrau e pa dhe nuk e ndihmoi. Ai ka emër, Leonidha Guçe” reagoi e revoltuar motra e të ndjerit.
Pas grumbullimit në sheshin Skëndërbej për vrasjen e Egli Progës, qytetarët kanë marshuar drejt Kryeministrisë.
Denis Mece, i cili akuzohet për dhunimin barbar ndaj Eglit e cila çoi në vdekjen e tij, aktualisht ndodhet në burg, ndërsa vrasja e 42 vjeçarit shkaktoi përplasje institucionale mes policisë dhe prokurorisë. Ndërsa policia e referoi ngjarjen si vrasje me dashje, prokurorja e Korçës e zbuti akuzën në ‘vrasje nga pakujdesia’
Familja kërkon drejtësi dhe kërkon që të zbardhet e vërteta e kësaj vrasjeje.