Një 51-vjeçar ka rënë në prangat e policisë sot në Durrës, pasi akuzohet si autori i një plagosjeje.
Ngjarja ka ndodhur në fshatin Fllakë, ku i plagosur ka mbetur një 25-vjeçar, teksa në kërkim për ngjarjen është shpallur dhe djali i 51-vjeçarit.
Raportohet se në një lokal janë përfshirë në një sherr 5 persona dhe babë e bir kanë qëlluar me armë zjarri, duke e plagosur në këmbë të riun. Sherri ka nisur pas një konflikti të çastit mes tyre.
Njoftimi i policisë:
Rreth orës 03:20, dyshohet se pas një konflikti të çastit, në një lokal në lagjen nr. 13, ndërmjet shtetasve R. C., 25 vjeç, K. C., 40 vjeç dhe M. C., 28 vjeç, vëllezër, të tre banues në fshatin Fllakë, dhe shtetasve A. K., 51 vjeç dhe E. K., 25 vjeç, babë e bir, është plagosur me armë zjarri, në këmbë, shtetasi R. C., i cili është jashtë rrezikut për jetën.
Si rezultat i veprimeve të shpejta procedurale, është kapur dhe vënë në pranga njëri nga autorët e dyshuar të plagosjes, shtetasi A. K., si dhe po punohet për kapjen e djalit të tij, shtetasit E. K..
Në drejtimin e Prokurorisë së Durrësit, vijojnë hetimet për të përcaktuar përgjegjësinë penale të shtetasve të përfshirë në konflikt, si dhe për të provuar ligjërisht rrethanat e tjera të këtij rasti.
