Prokuroria e Posaçme Anti-korrupsion ka dhënë pretencën ditën e sotme për ish-kryebashkiakun e Lushnjës, Fatos Tushe.
SPAK ka kërkuar 1 vit e 5 muaj burg ndaj Tushes, për akuzat e “mosdeklarim, fshehje e deklarim të rremë të pasurisë”. Në rast dënimi, Tushe do të përfitonte ulje të kohës së qëndrimit në burg, për shkak të gjykimit të shkurtuar, teksa ndaj tij tashmë ka nisur dhe hetimi pasuror.
Tushe akuzohet nga SPAK për mosdeklarimin e një apartament në Vlorë, një borxh dhe dy automjete në vlerën në total prej gati 50 mijë euro.
Vetëm pak muaj pasi shleu dënimin me 3 vite e 4 muaj burg për shpërdorim detyre dhe shkelje të barazisë në tendera, ndaj Fatos Tushes nisi një tjetër hetim që ka të bëjë me pasurinë.
Ish-kryebashkiaku socialist u dënua në korrik të 2022 me 2 vite e 4 muaj burg për shpërdorim detyre nga Gjykata e Posaçme e Shkallës së Parë, vetëm për shpërdorim detyre, ndërsa ra vepra e shkeljes së barazisë në tendera, teksa SPAK kërkonte dënimin e tij me 5 vite
Në mars të vitit të kaluar Apeli i Posaçëm i shtoi dënimin Fatos Tushes me 1 vit kur ky i fundit sapo kishte lënë qelinë pasi shleu dënimin. Ai u rikthye në qeli për të përfunduar pjesën e mbetur, këtë radhë për veprën penale të shkeljes së barazisë në tendera.