Deputeti i Partisë Demokratike, Flamur Noka, ka dhënë një skenar të ri mbi arsyet që çuan në arrestimin dhe burgosjen e kolegut të tij, Ervin Salianji.
Noka e cilësoi si një vendim politik atë që ka ndodhur me Salianjin, duke shtuar se vjen si pasojë e influencës direkte të Fatmir Xhafajt mbi sistemin e drejtësisë. Noka tha se Xhafaj është betuar në varrin e nënës së tij, se do të dënojë Salianjin, në shenjë hakmarrje për dënimin e vëllait të tij Agron Xhafaj. Ky i fundit pas denoncimit të rastit ‘Babale’ u ekstradua drejt Italisë, ku vuajti dënimin me burg për trafik droge.
“Vendimi është marrë në varrin e nënës së Xhafajt. Fatmir Xhafaj është betuar në varrin e nënës që unë do ta burgos, sa burg të bëjë vëllai im”, tha Noka.
Noka tha se dënimi i Salianjit i kujton “nenin 55” në diktaturë, dhe sipas tij ai duhej falenderuar publikisht për denoncimin që bëri.
“Ne kemi konsideruar vendimin politik, pasi botërisht dihet që është vendim që nuk ka bazë ligjore, gjyq politik që është zhvilluar prej vitesh me një qëllim për të mbajtur nën presion deputetin guximtar dhe kurajoz, njeriun që i shërbente opozitës dhe opozitarizmit, demokratin e madh, Ervin Salianjit. Dënimi i Salianjit na kujton nenin famëkeq, nenin 55.
Ervin Salianji, nuk është autori i asnjë vepre penale. Ervin Salianji thjesht kreu një shërbim publik ligjit, vendit, demokracisë në Shqipëri.
Ervin Salianji në një demokraci normale, duhet të falenderohej nga të gjithë. Bëri një shërbim demokracisë, ligjit, politikës. Tregoi me gisht që kemi një ministër me vëlla trafikant droge që fshihej. Tregoi se në shtetin e Edi Ramës, një trafikant droge i dënuar po maskohej.
Atij trafikantit nga pushteti i ishte dhënë pashaportë tjetër. Nga pushteti, jo vetëm fshihej, por i ishte dhënë mbështetje. Jo vetëm e fshehën por shteti i mafias e pajisi me pashaportë me emër tjetër, që ti shmangej burgut dhe të shëtiste i lirë në gjithë botën. Ku ndodh kjo? Ky njeri burgoset. Ky shtet mund të na përfaqësojë ne apo mafian?”, tha Noka.
