Tre mjekë që i dhanë ndihmë mjekësore në banesë një prej emrave më të njohur të botës së krimit, janë arrestuar zyrtarisht nga Policia.
Mjekët Julian Mala, 43 vjeç dhe Bledar Bërdalli, 41 vjeç, si dhe ndihmësmjeku, Ermal Gjeci, 36 vjeç, u prangosën në kuadër të operacionit policor të koduar “Arratia”, i cili nisi tri ditë më parë pas të shtënave me breshëri automatiku në aksin rrugor Peqin-Elbasan.
Me arrestimin e tyre, shkon në gjashtë numri i personave prapa hekurave, përfshirë edhe Nuredin Dumanin dhe “ushtarin” e tij Henrik Hoxhaj. Në prangat e Policisë ka përfunduar edhe një vajzë 20-vjeçare nga Kosova, e quajtur Mirjetë Hajdini, me të cilën dyshohet se Dumani kishte lidhje intime.
AKUZAT
Tre mjekët e arrestuar, të cilët pritet të dalin para togave të zeza në Elbasan gjatë ditës së sotme, akuzohen për dy vepra penale nga ana e Policisë, ajo e “Moskallëzimit të krimit” dhe “Veprime që pengojnë zbulimin e së vërtetës”.
Ndërkohë, 40- vjeçari Henrik Hoxhaj akuzohet për veprën penale “Vrasje me paramendim” e mbetur në tentativë, e kryer në bashkëpunim dhe armëmbajtje pa leje.
Ky shtetas dyshohet se ishte bashkë me Nuredin Dumanin gjatë të shtënave me armë në aksin rrugor Peqin-Elbasan në fshatin e quajtur Papër dhe akuzat që rëndojnë mbi të janë të njëjta me ato të 35-vjeçarit të përfshirë në një sërë vrasjesh.
E reja nga Kosova akuzohet gjithashtu për dy vepra penale, përfshirë atë të “Mbajtjes pa leje dhe prodhimit të armëve, armëve shpërthyese dhe të municionit” dhe “Përkrahje e autorit të krimit”.
Në të njëjtën kohë, Policia e Elbasanit thotë se ka ekzekutuar vendimin e Gjykatës së Rrethit Gjyqësor Elbasan ndaj shtetasit Nuredin Dumani, 35 vjeç, banues në Durrës, ndaj të cilit është caktuar masa e sigurisë “Arrest me burg”, për veprën penale “Vrasje me paramendim”, e mbetur në tentativë, e kryer në bashkëpunim dhe “Mbajtje pa leje dhe prodhimi i armëve, armëve shpërthyese dhe të municionit”.
Kjo masë sigurie përfshin vetëm ngjarjen e ndodhur në qytetin e Elbasanit pasditen e së martës, ku pati të shtëna me breshëri kallashnikovi.
Në vendin e ngjarjes janë gjetur edhe predha plumbash nga dy armë të ndryshme, por mbetet mister fakti se kush ishte personi i dytë që qëlloi. Në të njëjtën kohë, Policia lokale thotë se po heton intensivisht për përfshirjen e Nuredin Dumanit edhe në vepra të tjera penale.
“Drejtoria Vendore e Policisë Elbasan është duke hetuar, në bashkëpunim me Prokurorinë e Rrethit Gjyqësor Elbasan, lidhur me dyshimet për përfshirjen e shtetasit Nuredin Dumani, në vepra të tjera penale apo të lidhjeve të tij me aktivitetet kriminale, me qëllim dokumentimin me prova ligjore dhe zbardhjen e plotë të ngjarjeve për të cilat ka dyshime se ky shtetas mund të jetë autor”, thuhet më tej.
DËSHMITË
Tre mjekët e arrestuar nga Policia kanë deklaruar se nuk kishin dijeni se Dumani ishte përfshirë në veprimtari kriminale dhe se i kishin dhënë ndihmë mjekësore pasi ishin kontaktuar nga një person tjetër i njohur i tyre dhe se këtë ndihmë mjekësore e kanë ofruar në bazë të Betimit të Hipokratit për mos t’i mohuar kujdesin shëndetësor asnjë qenieje njerëzore.