Një shtetase shqiptare e shpallur në kërkim ndërkombëtar është prangosur në Londër, me qëllim ekstradimi në Shqipëri.
Top Channel mëson se e kërkuara e drejtësisë shqiptare Aurela Sinani 30 vjeçe, u identifikua nga Interpol Tirana se kishte mbërritur në Angli.
Sinani akuzohet se në periudhën kohore Gusht 2020-Shtator 2020 në Shqipëri, në bashkëpunim me të tjerë u përfshi në një konspiracion mashtrimi, në marrjen e një pensioni invaliditeti, duke paguar si ryshfet në dy raste shumat prej 70.000 lekë dhe 120.00 lekë.
Këto shuma sipas akuzës ia pagoi mjekëve të komisionit për të përfituar këtë favor.
Ky është rasti i dytë në Britaninë e Madhe kur një shtetase shqiptare arrestohet për qëllime ekstradimi si e kërkuar nga drejtësia shqiptare. Në Tetor 2023 Top Channel raportoi se sipas dokumenteve nga gjykata e ekstradimeve në Londër u arrestua Lirie Delishin.
Delishi 25 vjeç me banim në veri të Londrës, kërkohej pasi dyshohet se në datën 22/08/2019 në territorin e Shqipërisë, mbante një pasaportë rumune të falsifikuar, e cila i përkiste Simona Valcu. Më tej në aktakuzë shpjegohet se Delishi kishte si qëllim ta përdorte këtë pasaportë sikur të ishte e vërtetë duke i vendosur foton e saj.
