Drejtoria e Përgjithshme e Transportit Rrugor ka vendosur të marrë masa për të eliminuar radhët kilometrike për kolaudimin makinave. Gjatë kohës që shërbimi ofrohej nga privati, qytetarët rrinin me orë të tëra në pritje, por duke filluar nga tani, procesi do të bëhet online duke eliminuar radhët. Ka qenë Drejtoria e Transportit Rrugor që ka reaguar dje duke dhënë detaje mbi hapat që duhen ndjekur. “Rezervimi i orarit të Kolaudimit të mjetit rrugor kryhet direkt online për të gjitha Qendrat e Kontrollit Teknik pranë drejtorive rajonale të DPSHTRR! Risia është se ky sistem i ri rezervimi ofrohet me autentifikim në llogarinë e secilit tek seksioni “Makina ime” në e-Albania, duke eliminuar spekullimet dhe sekserët që abuzonin dikur me radhën! Mirëadministrojmë linjat, personelin, kohën e çmuar për të gjithë, normalizojmë rrjedhën e shërbimit duke shmangur flukset artificiale “nisem pa plan, kur më teket, vonohem radhëve””, thuhet në njoftimin e DPSHTRRR. Por si veprohet për të lënë orar përmes platformës e-Albania? Fillimisht Identifikohuni si qytetar ose subjekt në portalin e-Albania. Më pas zgjidhni shërbimin “Rezervim për Kontrollin Teknik të Mjetit”. Në vijim klikoni butonin “Përdor”. Më pas duhet të plotësoni të dhënat e kërkuara në formular lidhur me orarin, datën dhe ku do të kryeni kolaudimin e mjetit. Në fund klikoni butonin “Dërgo” për finalizimin e aplikimit. – Njoftimi do të dërgohet në adresën e-mail që keni përdorur për regjistrimin në portalin në e-Albania. Në rast se dëshironi të përdorni një email tjetër, ju duhet ta ndryshoni në rubrikën “Hapësira Ime” duke klikuar: Ndrysho të dhënat e llogarisë.
Anulimi i aplikimit
Aplikuesi dhe zotëruesi i mjetit (në rast se nuk janë i njëjti person), kanë të drejtë të anulojnë një rezervim deri 24 orë para orarit të përzgjedhur, pasi rezulton një rezervim aktiv në llogarinë e tyre në e-Albania. Në rast se mjeti nuk shfaqet në listën e mjeteve në pronësi ose vërehet ndonjë problematikë tjetër, mund të dërgohet email në adresën: [email protected] ose [email protected]. Në rast se një shtetas i huaj aplikon për këtë shërbim, duhet të përzgjedhë në e-Albania opsionin “Identifikim si Shtetas i Huaj” për të vijuar me procedurën.
Kontrolli Teknik mund të kryhet pranë çdo drejtorie rajonale, pra nuk është e nevojshme që qytetarët të paraqiten pranë DRSHTRR-së ku rezulton dosja e mjetit ose ku kanë vendbanimin. Në rast se nuk është kaluar kontrolli i parë, atëherë është e detyrueshme që rikontrolli të kryhet në po të njëjtën Qendër të Kontrollit Teknik (DRSHTRR). Me kthimin e shërbimit të kontrollit teknik te DPSHTRR dhe miratimin e Kodit të ri Rrugor, afatet e reja të vlefshmërisë së Certifikatës së Kontrollit Teknik janë si më poshtë: Autoveturat e motomjetet e reja (regjistrim për herë të parë/0 km) nuk kolaudohen 3 vitet e para! (çdo mjet tjetër i ri nuk kolaudohet vitin e parë). Mjetet autovetura e motomjete me km (të përdorura), kolaudohen çdo 2 vjet. Taksi, autoshkolla, mjete transporti udhëtarësh (autobus), mjete transporti speciale, ambulanca dhe mjete transporti mallrash kolaudohen çdo 1 vit. Afatet e reja do t’i njihen çdo mjeti me Certifikatë Kontrolli Teknik që ka datë skadence pas datës 23 dhjetor 2020! (Mjetet e reja të regjistruara për herë të parë do të përfitojnë periudhën përkatëse pa detyrim kolaudimi).