Tre shqiptarë kanë rënë në prangat e policisë në Itali, pasi kishin kthyer banesën e tyre në “shtëpi bari”.
Mediat vendase raportojnë se të arrestuarit janë Pandeli Prifi, Lulzim Ndreu dhe Kujtim Rrapushi, të cilët prej disa muajsh mbaheshin nën survejim nga policia Italiane, pasi dyshoheshin se merreshin me trafikim të lëndëve të paligjshme.
Ata zotëronin një vilë në zonën e Vittorias, ku pas kontrolleve u gjetën 50 kilogram hashash dhe 1 kilogram heroinë të cilat kapnin vlerën e më shumë se 600 mijë eurove. Për njërin nga shqiptarët ishte lëshuar dhe më herët një fletë-arresti për disa krime të tjera të bëra në Itali, por ai kishte mundur t’i shmangej pasi lëvizte me letra greke.
Megjithatë në fund ishin gjurmët e gishtave ato që e tradhtuan. Të tre shqiptarët ndiqeshin të gjithë për krime droge apo pronësie.