Gjykata e Posaçme e Krimeve të Rënda (GjKKO) ka lënë në fuqi masën e sigurisë ‘arrest me burg’ për Plaurent Dervishajn, i akuzuar në dosjen “Asgjë Nuk Harrohet” për vrasjen e Vajdin Lamajt dhe Klodian Saliut.
Në seancën e sotme gjyqësore, Dervishaj ka pretenduar se sjellja e tij në Shqipëri nuk është bërë përmes ekstradimit, por përmes një “rrëmbimi personi”. Report Tv raporton detaje nga deklaratat e Dervishajt, i cili ka përshkruar ngjarjet që ndodhën në Dubai.
Dervishaj ka deklaruar se më 6 gusht, forcat speciale të Dubait erdhën në banesën e tij, duke thyer derën dhe duke e informuar se jeta e tij ishte në rrezik dhe se po zhvillohej një atentat ndaj tij. Ai tha se ishte çuar në një stacion policie në Dubai, ku nuk kishte mundësi të fliste me avokatin e tij. Pas një periudhe prej 10 ditësh në këtë stacion, ai është transportuar me avion dhe arrestimi është bërë në aeroportin e Rinasit.
Sa i përket akuzave për vrasje, Dervishaj ka insistuar se është i pafajshëm dhe se nuk ka lidhje me ngjarjet e ndodhur.
Dervishaj u soll në Tiranë më 14 gusht, ndërsa në Rinas i shoqëruar nën masa të forta sigurie u shfaq me shapka dhe pantallona të shkurtra cka tregon se sjellja e tij në Tiranë ishte bërë në një operacion të fshehtë dhe të shpejtë.
Sa i takon dy vrasjeve të bujshme për të cilat Dervishaj doli sot në masë sigurie ka pretenduar se është i pafajshëm dhe nuk ka lidhje me ngjarjen.
Anëtari i Bandës së Durrësit, akuzohet për vrasjen e Klodian Saliut në 2005, kryer në bashkëpunim si dhe Vajdin Lamajt e Artan Arsit me eksploziv, po në të njëjtin vit.