Policia e Tropojës i është vënë pas shtetasit Ilir Murataj pasi gjatë kontrollit në banesën e tij në Çerem janë gjetur armë zjarri, municion luftarak dhe fara kanabisi.
Nga konstatimi i policisë, Muratajt iu gjet edhe një pushkë tip snajper.
Murataj është vëllai i Admir Murataj i cili ishte “truri” i grabitjes spektakolare të Rinasit ku me dhunë e nën kërcënimin e armëve grabitën rreth 3.2 mln euro.
Por, kush është Ilir Murataj?
Ilir Murataj njihet si Can Murataj dhe është 53 vjeç. Ai u bë i njohur për publikun tre vite më parë, kur vëllai i tij Admir Murataj u vra gjatë grabitjes së Rinasit, ku një grup personash u futën në pistë dhe morën nga barku i avionit rreth 4 milion euro.
Kur shkoi të merrte trupin e të vëllait, Murataj bëri disa deklarata të bujshme në atë kohë, fill pas varrimit duke lënë të kuptohej se vëllain mund t’ja kishin vrarë të tjerë dhe jo policia, megjithatë, të paktën publikisht ato deklarata mbeten aty.
Njoftimi i policisë për ngjarjen e sotme
Goditet një rast i armëmbajtjes pa leje. Sekuestrohen një armë zjarri automatik, një pushk tip snajper, një sasi municioni luftarak, fara të dyshuara narkotike kanabis, dylbi dhe elektrik dore.
Shpallet në kërkim 53-vjeçari që i posedonte.
Në vijim të punës për goditjen e rasteve të armëmbajtjes pa leje, bazuar dhe në informacionet e siguruara për një rast të mbajtjes pa leje të armëve, në fshatin Çerem, strukturat e Hetimit të Krimit në DVP Kukës, në bashkëpunim me Komisariatin e Policisë Tropojë, kanë organizuar punën dhe ushtruar kontroll në banesën e shtetasit I. M.
Shërbimet e Policisë, gjatë kontrollit të ushtruar në banesë, gjetën dhe sekuestruan në cilësinë e provës materiale një armë zjarri automatik, pushk tip snajper, një sasi municioni luftarak, fara të dyshuara narkotike kanabis, dylbi dhe elektrik dore.
Në vijim të veprimeve u bë shpallja në kërkim për veprat penale “Mbajtja pa leje dhe prodhimi i armëve, armëve shpërthyese dhe i municionit” dhe “Prodhimi dhe shitja e narkotikëve”, e pronarit të banesës, shtetasit I. M., 53 vjeç, banues në fshatin Çerem, Tropojë.
Materialet i hetimore i kaluan Prokurorisë pranë Gjykatës së Shkallës së Parë Tropojë, për veprime të mëtejshme.