Agustin Kaza ishte shënjestër e një atentati në Bruksel mbrëmjen e së dielës (28 prill).
44-vjeçari ishte duke pirë kafe në një lokal shqiptarësh në rrugën Joseph Brand, në Schaerbeek, kur u qëllua disa herë në kokë dhe kraharor. Një burrë teksa po ecte pranë tij, i ka dalë përballë, e ka qëlluar disa herë dhe më pas është larguar.
Autoritetet belge kanë raportuar se gjendja e shqiptarit është tepër kritike pasi plumbat janë qëlluar nga një distancë e afërt. Hetimet për këtë vrasje të mbetur në tentativë, Prokuroria ia ka besuar seksionit të vrasjeve të policisë gjyqësore federale në Bruksel.
Ka dyshime se atentati ndaj tij ka qenë për motive gjakmarrje pasi ai është vëllai i Martin Kazës, i dënuar për vrasjen e dy personave më 3 korrik të vitit 1997 në Mirditë. Martin Kaza është dënuar me 22 vite burg për vrasjen e vëllezërve Dod dhe Augustin Gjini të cilët dyshoheshin se i kishin vrarë vëllain në qendër të Rrëshenit në 1994.
Por nuk përjashtohet edhe mundësia e prishjes së pazareve të drogës pasi zona ku ndodhi atentati kohëve të fundit ka qenë në qendër të kontrolleve policore, pasi ka pasur një dhunë të shtuar, por edhe trafik droge.
Si nisi hakmarrja mes dy fiseve?
Më datë 7 Janar të vitit 1994 qyteti i Rrëshenit u trondit nga vrasja e Shefit të Krimeve, Ndue Kaza. Ai dyshohet se u qëllua me armë zjarri në mes të qytetit nga Dod Gjini dhe Augustin Gjini, të cilët pas ngjarjes u arratisën.
Në vitin 1997, shtetasi Martin Kaza ka vrarë për hakmarrje në qytetin e Laçit, vëllezërit Dod Gjini dhe Augustin Gjini, të cilët kanë qenë autorët e dyshuar të vrasjes se vëllait të tij në vitin 1994. Martin Kaza është dënuar për vrasjen me 22 vite burg për veprat penale ”Vrasja me paramendim, e kryer në bashkëpunim” si dhe “Armëmbajtje pa leje”.
Kaza u arrestua në Londër, ndërsa në vitin 2017 u ekstradua dhe vijon të kryej dënimin në Shqipëri. Edhe pse Marti Kaza ndodhet në burg, kjo nuk e ka ndalur gjakun mes fiseve. Edhe pas kaq vitesh, ku shënjestra e fundit ishte Agustin Kaza.