Kryeministri Edi Rama ka reaguar për herë të parë në lidhje me kërcënimet e palës greke, për arrestimin e kryebashkiakut të zgjedhur të Himarës, Fredi Beleri.
Në një konferencë me gazetarët, Rama tha se nuk do të ketë asnjë ndërhyrje që drejtësia të bëjë punën e vet.
“Nuk ka shans sa të jem unë këtu presion mbi drejtësinë e re të ushtrohet dhe të funksionojë duke kaluar përmes kërcënimeve apo insinuatave. Nuk ka shans. Kjo drejtësi është ajo që i duhet Shqipërisë që Shqipëria të bëhet shteti që kanë ëndërruar ata që e kanë krijuar.
Nga ana tjetër e dini shumë mirë qe kemi pasur edhe një situatë të inflamuar për shkak të problemit me drejtësinë të kryebashkiakut të zgjidhur në Himarë. Qëndrimi ynë ka qenë është dhe do të jetë që drejtësia e re duhet të bëjë e patrazuar detyrën e saj. Në këtë pikë asgjë nuk është më e rëndësishme sesa mbrojtja me të njëjtën mënyrë sic kemi vepruar në rastet e tjera e qetësisë së veprimtarisë së sistemit të ri të drejtësisë. Kështu që asnjë lloj interference ngado që të vijë mbi sistemin e drejtësisë nuk do të gjejë mirëkuptimin tonë. Ne nuk ndërhyjmë në sistemin e drejtësisë, ne nuk i komentojmë vendimet e organeve të reja të drejtësisë dhe nuk presim gjë tjetër veçse të zbatojnë ligjin. Ne i japim mbështetjen pa kushte qoftë kur na vjen mirë, qoftë kur nuk na vjen mire. Qoftë kur na pëlqen qoftë kur nuk na pëlqen.
Reforma e drejtësisë në Shqipëri është gjëja më e madhe, më e rëndë gjeja më e paimagjinueshme deri para pak vitesh që i ka ndodhur shtetit shqiptar. Jo sot, por në historinë e vet” tha Rama.