Një 45 vjeçar shqiptar është arrestuar nga policia italiane së bashku me pronaren e një lavanderie pasi në vendin ku ata punonin, u gjetën kokainë dhe 30 mijë euro cash.
Oficerët e policisë së Riminit kishin pikasur prej kohësh drogën brenda lavaderisë dhe për të shuar dyshimet ata kryen një kontroll të befasishëm duke gjetur 60 gramë kokainë dhe një shumë të madhe parash prej 30 mijë euro cash, së bashku me mjetet e nevojshme për paketimin e barnave (substancë prerëse, peshore precize dhe makinë vakum që përdoret për përgatitjen e dozave, shkruajnë mediat italiane.
Pas kontrolleve, policia vuri në pranga pronaren e biznesit dhe 45-vjeçarin shqiptar. Ata dolën sot para gjykatës së Riminit, ku 45 vjeçari shqiptar është mbrojtur duke thënë se nuk merrej me trafik droge dhe se mjetet që shërbenin për paketimin e kokainës i ruante për një bashkëfshatarin e tij i cili ishte kthyer në Shqipëri. Nga ana tjetër, pronarja ka mohuar të ketë dijeni për praninë e drogës në lavanderi duke thënë se ajo nuk ka gisht në trafikun e kokainës. Gjykata caktoi seancën e radhës për në 3 mars të këtij viti për të vendosur mbi çështjen e dy të arrestuarve për kokainë. /Panorama