Një video e shpërndarë në rrjetet sociale ka ngjallur reagime të shumta pasi tregon biznesmenin Vasil Bedinaj, pronar i “Regina Group”, duke goditur një qytetar pas një debati për hapësirat e plazhit në Vlorë. Në video, Bedinaj dhe grupi i tij janë duke debatuar me qytetarin për zonat e zëna të plazhit privat, dhe tensionet duket se shpërthejnë në një konfrontim fizik.
Pas publikimit të videos, Bedinaj ka reaguar përmes një tjetër videoje, ku ai së bashku me qytetarin që u godit kanë sqaruar ngjarjen. Sipas Bedinaj, incidenti nuk ka ndodhur në ditën e shpërndarjes së videos, por një muaj e gjysmë më parë. Ai theksoi se, pas incidentit, të dy palët e kanë kuptuar se kanë bërë një gabim dhe janë sqaruar me njëri-tjetrin. Ai po ashtu nënvizoi se ata janë komshinj dhe se turistët janë të mirëpritur në zona.
Bedinaj kërkoi ndjesë për incidentin dhe shpjegoi se pas 30 minutash nga ngjarja, të dy palët e kishin zgjidhur çështjen dhe ishin përqafuar. Gjithashtu ai theksoi se gabimi ka ndodhur dhe kërkoi që ky incident të kuptohet si një pasojë e një situate të ndodhur më herët, duke shpresuar që kjo të jetë një mësim për të gjithë.