Ish-presidenti Ilir Meta deklaroi mbrëmjen e djeshme se ka nisur procedurat e divorcit me bashkëshorten e tij, Monika Kryemadhi. Si arsye për vendimin ai u shpreh se janë qëndrimet e kundërta politike që kanë krijuar dhe përçarje në marrëdhënien personale mes tyre.
I ftuar në Top News, avokati Kujtim Ibra u shpreh se sipas tij, përçarja mes ish-çiftit presidencial ka nisur që në vitin 2019, për shkak të djegies së mandateve nga Kryemadhi, Avokati tha se Meta nuk e ka falur këtë gabim.
“Është një diçka që Ilir Meta nuk ia ka falur kurrë, djegien e mandateve në vitin 2019. Që atëherë u aludua shumë që këta mund të shkonin në divorc përfundimtar. U mbajt sa u mbajt familja, dhe ja ku jemi sot. Ilir Meta është nga ata që nuk të fal kollaj, e ka treguar që është kokëfortë, lider intuitiv, por nuk të fal kollaj kur vjen puna për gabime të rëndësishme. Dhe në këtë rast, edhe Meta edhe Kryemadhi e kanë përmendur shumë herë çështjen e djegies së mandateve dhe Ilir Meta që në vitin 2019 nuk ia ka falur bashkëshortes së tij një diçka, ‘si mund t’i djegësh ti mandatet për deputet dhe unë jam në Gjermani dhe nuk më bën një telefonatë’.
Kjo ishte një thyerje shumë e madhe. Duke njohur karakterin e fortë të Ilir Metës, unë them që thyerja mes tyre ka ndodhur në vitin 2019. Dhe pastaj ka ardhur duke u zmadhuar. Edhe në atë kohë flitej që kishte përplasje të mëdha mes çiftit për shkak të këtij veprimi politik dhe duke e njohur Metën, ai nuk t’i fal gabimet politike.”-tha avokati.