Finalizimi i procedurave nga ana e autoriteteve shqiptare do të shohë Ardian Sufaj alias Pllumb Sufaj të ekstradohet në Itali.
Masa e sigurisë “Arrest me burg” u caktua për 40-vjeçarin nga Gjykata e Apelit të Triestes. Mbi të rëndojnë veprat penale “Trafikimi i narkotikëve”, kryer në kuadrin e organizatës kriminale, si dhe “Pengmarrja”.
Sufaj ishte shpallur në kërkim ndërkombëtar nga autoritetet italiane për trafikimin e 100 kg kokainë dhe për pengmarrje.
Ai u kap në një lokal pas informacioneve që policia shqiptare kishte marrë për vendndodhjen e tij. 40- vjeçari Sufaj cilësohet si kreu i një organizate kriminale në vendin fqinj që merrej me trafikun e kokainës.
Gjatë periudhës tetor 2022- janar 2023, bashkë me persona të tjerë, ai ka blerë dhe trafikuar 100 kg kokainë nga Ekuadori, me qëllim shitjen në Itali.
Gjatë transportimit kokaina është vjedhur nga persona të paidentifikuar dhe Ardian Sufaj me bashkëpunëtorë të tij kanë marrë peng një shtetas italian në kërcënimin e armës, me qëllim mbledhjen e informacionit për vjedhjen e kokainës.