Kryeministrja italiane Giorgia Meloni ka rënë pre e një sulmi kibernetik, teksa llogaria e saj në rrjetin social Instagram është hakuar.
Gjithçka u kuptua kur në profilin e kryeministres italiane është publikuar një postim me shkrimin ‘Faleminderit Elon free Btc!’ dhe fotografia e rreme e profilit të Elon Musk.
Pas pak minutash, teknikët e Palazzo Chigi kanë ndërhyrë menjëherë për të fshirë përmbajtjet false të publikuara, por tashmë ato po qarkullojnë në rrjetet sociale.
Lajmin për hakerimin e faqes së Instagramit e konfirmoi drejtpërdrejt Palazzo Chigi. Profili i hakuar është ai personal, historik i Melonit, i hapur vite më parë. Aktualisht po vijojnë të gjitha hetimet e nevojshme. Sulmi kibernetik ndodhi teksa Meloni po fluturonte për në Romë, pas vizitës në Egjipt.