Ngjarja tragjike që ndodhi në Roskovec ka marrë një kthesë të re me zbardhjen e detajeve të fundit.
Autori i dyshuar i vrasjes së dyfishtë, Altin Kuka, ka lënë armën tip kallashnikov në vendngjarje dhe ka shkuar në një treg fruta-perimesh, ku bashkëshortja e tij po shiste produkte. Kuka i është drejtuar gruas me fjalët: “Unë i vrava të dy, po shkoj të dorëzohem në polici.”
Pas kësaj deklarate, Kuka e ka pranuar autorësinë e vrasjes së Gramos dhe Lavdimir Kurtaj gjatë marrjes në pyetje nga policia. Sipas informacionit të deritanishëm, shkaku i ngjarjes ka qenë një sherr mes fëmijëve.
Të shtënat ndodhën në një lokal të fshatit, ku Altin Kuka kishte shkuar së bashku me të birin 21-vjeçar “për t’u sqaruar”. Dyshohet se konflikti që çoi në vrasjen e dyfishtë kishte origjinën në një grindje mes djalit të autorit dhe djalit të njërit prej viktimave, Gramos Kurtajt.
Hetimet për zbardhjen e plotë të rrethanave të ngjarjes janë në vazhdim, ndërsa komuniteti është i tronditur nga ky akt i dhunshëm që ka lënë dy familje të prekur.