Është plagosur me thikë ish-efektivi i policisë, Lavdosh Metaj, i cili u arrestua në vitin 2021 për shpërndarje kokaine
Ish-efektivi i policisë, Lavdosh Metaj, i cili u arrestua në vitin 2021 për shpërndarje kokaine, ka mbetur i plagosur mëngjesin e ditës së sotme.
Ish-efektivi i Shqiponjave, i cili ishte liruar 3 muaj më parë më parë pasi përfitoi nga Amnistia, dyshohet është goditur me thikë nga roja i një hoteli në orët e para të mëngjesit të sotëm.
Nga informacionet paraprake bëhet e ditur se 41-vjeçari me origjinë nga Mallakastra kishte parkuar automjetin brenda hotelit në lagjen nr.1 të qytetit të Sarandës dhe kur ka shkuar ta marrë, nuk ka pranuar të kryejë pagesën.
Për këtë shkak është konfliktuar verbalisht dhe më pas fizikisht me rojen e hotelit, çka ka degjeneruar në përdorimin e thikës. Metaj është transportuar drejt spitalit të Sarandës ku ka marrë ndihmën i parë. Policia është ndodhur menjëherë në vendngjarje dhe ka shoqëruar autorin e dyshuar me inicialet A. Sh.
Ndërkohë kujtojmë se Lavdosh Metaj u arrestua më 12 qershor të vitit 2021 pas një operacioni të Agjencisë së Mbikëqyrjes Policore, në kuadër të hetimeve qe zhvilloheshin ndaj tij për shpërndarje kokaine në Sarandë.
Në momentin e arrestimit në flagrancë, efektivit iu sekuestruan 11 doza kokainë, me peshë totale 5 gramë, ndërsa gjatë kontrollit në shtëpi, iu gjetën edhe 165 gramë, lëndë narkotike, e të njëjtit lloj, kokainë, si dhe një peshore elektronike.
Një ish-efektiv i Forcave “Shqiponja” të Sarandës më 10 nëntor 2022 është dënuar me 5.4 vite burg nga Gjykata, pasi u shpall fajtor për shpërndarje të lëndëve narkotike.
Vendimi u dha nga gjyqtarja Suela Xhani, e cila e dënoi atë me 8 vite burg, por për shkak të gjykimit të shkurtuar përfitoi ulje dënimi.