Si rezultat i bashkëpunimit të ngushtë mes Interpol Tiranës dhe Interpol Wiesbaden, është finalizuar ekstradimi i shtetasit Akil Qeleposhi, 33 vjeç, nga Frankfurti në Shqipëri. Qeleposhi, i lindur në Bajram Curri, ishte shpallur në kërkim ndërkombëtar për të vuajtur dënimin e shqiptuar ndaj tij.
Në vitin 2022, Gjykata e Apelit të Shkodrës e dënoi Qeleposhin me 23 muaj e 7 ditë burgim për veprën penale “Mbajtja pa leje dhe prodhimi i armëve, armëve shpërthyese e municionit”. Shtetasi i akuzuar ishte kapur në vitin 2020 gjatë një kontrolli në një lokal në Bajram Curri, ku u gjet me një pistoletë dhe municion luftarak, ndërsa në banesën e tij u zbuluan gjithashtu një kallashnikov dhe municion luftarak.
Pasi mbërriti në Shqipëri, 33-vjeçari u dorëzua Drejtorisë së Përgjithshme të Burgjeve për të vijuar procedurat e mëtejshme ligjore dhe ekzekutimin e dënimit të tij.