Janë zbardhur identitetet e tre shqiptarëve të arrestuar në Portin e Livornos në Itali, pas një tentative për të nxjerrë 148 kilogramë kokainë nga një kontejner me banane i mbërritur nga Porti i Guayaquil në Ekuador. Sipas mediave italiane, të arrestuarit janë vëllezërit Ylber dhe Napolon Arshi, 37 dhe 35 vjeç, dhe Goliano Zhupa, 30 vjeç.
Të arrestuarit nuk ishin rezidentë në Itali dhe nuk dispononin dokumente identiteti, çka i bëri hetuesit më të vështirë për t’i identifikuar. Hetimet u realizuan nga Fiamme Gialle në bashkëpunim me Agjencinë e Doganave dhe Monopoleve, të cilët ishin informuar për tentativën e trafikantëve për të grumbulluar lëndën narkotike të fshehur në kontejner.
Në bazë të sinjalizimeve të ndara nga Agjencia Doganore, u përdor një skaner për të identifikuar 139 pakot brenda kontejnerit. Pasi u konfirmua ngarkesa, efektivët e Fiamme Gialle u pozicionuan dhe pritën disa orë për të kapur individët që do të merrnin kokainën. Kur ata arritën në vendin e ngarkesës, nuk bënë rezistencë dhe u arrestuan menjëherë.
Shqiptarët e arrestuar do të kishin marrë një dëmshpërblim prej disa mijëra eurosh nëse do të ishin të suksesshëm në grumbullimin e drogës. Gjykata e Livornos ka vërtetuar sekuestrimin dhe arrestimet, duke e cilësuar këtë ngjarje si sekuestrimin më të madh të kokainës në vitet e fundit në portin e Livornos. Droga nuk qëndron në qytetin toskan, por shpërndahet nga trafikantë në Itali dhe jashtë saj.