Një ngjarje e rëndë ka ndodhur gjatë natës në Elbasan, teksa një efektiv policie është kërcënuar me jetë.
Raportohet se ngjarja ka ndodhur në lagjen “Luigj Gurakuqi”, kur efektivi jashtë orarit të shërbimit ka pikasur një person që qarkullonte i armatosur dhe e ka ndaluar. Në këtë moment, 26-vjeçari i ka drejtuar armën policit duke e kërcënuar se do e vriste.
Fatmirësisht, në vendngjarje kanë mbërritur në kohë efektivët e patrullës dhe forcat “Shqiponja” që kanë bërë të mundur arrestimin e të riut.
Njoftimi i policisë:
Qarkullonte i armatosur me pistoletë, në mesnatë, në lagjen “Luigj Gurakuqi”, konstatohet nga një punonjës policie që ishte jashtë orarit të shërbimit.
Në momentin e konstatimit, shtetasi i armatosur ka kanosur punonjësin e Policisë, për ta vrarë.
Falë veprimeve profesionale të punonjësit të Policisë dhe mbërritjes në kohë të Patrullës së Përgjithshme dhe Forcës së Posaçme “Shqiponja”, që ishin në patrullim në qytet, të cilat ishin njoftuar nga punonjësi i Policisë, është neutralizuar dhe arrestuar 26-vjeçari.
Në cilësinë e provës materiale u sekuestrua arma e zjarrit pistoletë me municion luftarak.
Në përfundim të veprimeve të para procedurale u bë arrestimi në flagrancë i shtetasit R. B., 26 vjeç, banues në Elbasan.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme, për veprat penale “Kanosja për shkak të detyrës “ dhe “Mbajtja pa leje dhe prodhimi i armëve, armëve shpërthyese dhe municionit luftarak”.