Darka e Krishtlindjeve rrezikoi të kthehej në një tragjedi në Itali pas një sherri mes një grupi shqiptarësh. Mediat italiane shkruajnë se mbrëmjen e 24 dhjetorit një grup shqiptarësh u takuan për të festuar natën e Krishtlindjes në shtëpinë e një bashkatdhetari 56-vjeçar që jeton në via Trevisan në Peraga di Vigonza. Gjithçka shkoi mirë derisa pronari u përlesh me një nga të ftuarit, një 54-vjeçar. Ai e ka kërcënuar me thikë dhe më pas e ka goditur në fyt. I plagosuri ka ikur menjëherë, por të bërtiturat e tij kanë tërhequr vëmendjen e fqinjëve të cilët kanë thirrur policinë. I plagosuri është dërguar në spitalin e Padovës ku mjekët i kanë thënë se duhet të rrijë të paktën 15 ditë në spital.
Edhe autori i plagosjes me thikë, i cili kishte pirë pak si shumë përfundoi në spital pasi nuk po ndihej mirë. 56-vjeçari u ka shpjeguar karabinierëve se ishte grindur me të ftuarin për xhelozitë e vjetra, por sipas fqinjëve nuk është hera e parë që në atë shtëpi bëhen diskutime të rënda.