Marjus Musaku është 32-vjeçari, i cili qëndron ende pas hekurave të qelisë pasi akuzohet për rrëmbimin e një gruaje. 30-vjeçarja Ersida Dyrmishi, nënë e dy fëmijëve u shpall e zhdukur nga bashkëshorti i saj më datë 25.07.2022.
Në momentin që ajo u gjet, ka dëshmuar se është mbajtur pa dëshirën e saj nga Marjus Musaku nga data 25 korrik deri me 3 gusht. E reja ka bërë denoncimin në policinë e Durrësit së bashku me bashkëshortin e saj.
Sipas njoftimit zyrtar të policisë, 32-vjeçari ka abuzuar seksualisht me nënën e dy fëmijëve, duke e përdhunuar nën kërcënimin e një thike dhe kanosur për jetën e familjarëve të saj.
Ditën e sotme, Marjus Musaku ka dhënë një intervistë për emisionin “Shqipëria Live” në Top Channel, ku u bëri një deklaratë bombë për 30-vjeçarin. Sipas tij, ajo ka pasur një lidhje edhe me shokun e burrit të saj.
Musaku shtoi gjithashtu se bashkëshorti i saj e dinte se ajo ishte e lidhur me të.
“I ka thënë burrit se donte ta linte, ka qenë në dijeni për ne. Kam pasur një shtëpi, e shita. E pyeta nëse më do, më tha po. Ditën e hënë, datë 1, asaj i vjen një mesazh nga shoku i burrit. Prandaj i thashë merre në telefon burrin dhe shko, të kthehet në shtëpi. Prandaj ajo ka reaguar kështu”, tha Marjus.
Musaku pretendon se Ersida kishte lidhje njëkohësisht me të dhe me shokun e bashkëshortit.
“I pranoi ajo. Merre burrin në telefon i thashë, nuk je për mua. Nuk e di nëse ka folur me njeri kur ishte me mua”, tha 32-vjeçari.
Ky i fundit hedh poshtë akuzat e Dyrmishit, duke thënë se nuk e ka përdhunuar dhe se ka shkuar me të me dëshirën e saj.
“Nuk është asgjë e vërtetë, ka qenë me dëshirën e saj me mua. Kemi pasur marrëdhënie të shkëlqyer, e ka bërë këtë se e lashë. Nuk kam pasur kontakt më, i kam paguar kopshtin e vajzave. Dua që të vij të thotë të vërtetën”, përfundoj Musaku.