Sot shënohen 20 vite nga themelimi i Lëvizjes Socialiste për Integrim, tashmë e quajtur Partia e Lirisë.
Këtë përvjetor, Ilir Meta ka zgjedhur ta festojë ndryshe, duke vazhduar aventurat e tij në natyrë, por pa harruar të thumbojë, ish-bashkëshorten Monika Kryemadhi.
Meta ka ndarë një video në Facebook, ku ka falënderuar të gjithë anëtarët dhe simpatizantët e partisë, ndërsa ka përkujtuar disa nga figurat që kanë dhënë kontribut në Partinë e Lirisë, por sot nuk janë më.
Ndërkohë, Meta nuk shmangu as një mesazh për Monika Kryemadhin, me të cilën tashmë janë në proces divorci. Pa e përmendur Kryemadhin me emër, Meta kujton Konventën e 27 prillit, duke thënë se i dha fund nepotizmit dhe korrupsionit. Kujtojmë që në këtë Konventë u nda edhe rruga politike e Metës dhe Kryemadhit, pasi ky i fundit e largoi nga strukturat e partisë.
“Mirëmëngjesi të gjithë anëtarëve dhe simpatizantëve të Partisë së Lirisë! Mirëmëngjesi dhe përqafime të gjithë themeluesve, 20 vite më parë, të Lëvizjes Socialiste për Integrim, që hapi një faqe të re në jetën politike të vendit, që ndihmoi aq shumë për zhbllokimin e proceseve të integrimit europian dhe garantoi dy rotacione demokratike në vend, si dhe imponoi shumë reforma që i shërbyen vendit për integrimin europian.
Mirënjohje të përjetshme për të gjithë ata që nuk jetojnë më dhe që dhanë kontributet e tyre më të çmuara në këtë themelim, për Afërdita Tutulanin, motrën e Heronjve të Popullit Margarita dhe Kristaq Tutulani, për Profesor Syrja Hysin, një personalitet i jashtëzakonshëm nga një familje patriotike brez pas brezi, për ish-Gjeneral Veli Llakën, një personalitet i madh i ushtrisë shqiptare dhe patriot i vërtetë, si edhe për shumë e shumë të tjerë.
Një përshëndetje të veçantë për të gjithë ata që u detyruan të largohen nga vendi, por që mendjen dhe zemrën e kanë këtu dhe që kanë nisur të organizohen fort për realizimin e programit tonë të 5 Prioriteteve madhore për Shqipërinë me 4 milion shqiptarë plus.
Një keqardhje për të gjithë ata që e nisën si idealistë dhe përfunduan si patronazhistë dhe patronazhiste. Dhjetëra bien (blihen), mijëra ngrihen! Unë personalisht jam 20 herë më i ri se 20 vite më parë dhe 20 herë më i fortë se 20 vite më parë.
Konventa historike e 27 Prillit ishte një moment madhor për t’u ndarë njëherë e përgjithmonë me nepotizmin, me korrupsionin, me imoralitetin dhe për të vendosur njëherë e përgjithmonë integritetin, transparencën dhe meritokracinë si shtyllat që do të jenë garant për jetëgjatësinë dhe suksesin e Partisë së Lirisë shumë shpejt dhe për dekadat që do të vijnë!
Shqipëria me 5 Prioritetet tona do të bëhet me 4 milionë shqiptarë plus shumë shpejt dhe për këtë duhet të kontribuojmë të gjithë.“- shrkuan Meta.
