“Fluturo lart, Kevin, si shqiponjat fluturojnë mbi botë, fluturo te Zoti”. Me këto fjalë mallëngjyese, pasditen e së shtunës së 3 qershorit, në Katedralen e Latisanës, nisi ceremonia mortore për t’i dhënë lamtumirën e fundit Kevin Muratajt,19 vjeçarit me origjinë shqiptare.
I riu humbi jetën në një aksident tragjik në orët e vona të së premtes 26 maj 2023, pasi u përplas për vdekje teksa kalonte në vijat e bardha.
Kevin së bashku me shokët e shoqet e klasës kishte dalë nga një piceri dhe ishin nisur për në diskotekë për të festuar mbrëmjen e maturës kur ndodhi aksidenti tragjik.
Qindra njerëz kishin shkuar për të ngushëlluar të ëmën Elisabetën dhe babain Alket, dy fëmijët e tyre të mitur dhe xhaxhain e tyre Erlind.
Ne nuk duhet të humbasim shpresën dhe as besimin, ashtu siç na mësoi Kevin – tha Imzot Carlo Fant i cili kremtoi ceremoninë mortore –. Shpirti i tij që tani ka gjetur paqe do të qëndrojë gjithmonë pranë atyre që e donin”.
Gjatë ceremonisë, u fol edhe në shqip gjuha mëmë e familjes Murataj e cila kishte vite që jetonte në Itali dhe ishte integruar mjaft mirë. Mes njerëzve dhe shumë të rinj, shokët dhe shoqet e Kevin. Dëshpërim, tronditje dhe trishtim tek i gjithë komuniteti latisanez, ku familja Murataj jetonte prej vitesh.
Më pas dalja e arkivolit nga katedralja u shoqërua me tullumbace të bardha që u lëshuan në qiell dhe një duartrokitje të gjatë, shkruan faqja online Il Messagero