Kandidati i koalicionit “Bashkë Fitojmë” për bashkinë e Mirditës, Albert Melyshi u shpall fitues në zgjedhjet e 14 Majit. Menjëherë pas fitores, ai ka bërë një reagim në rrjetet sociale, ndërsa i ka bërë një ftesë për kafe kryeministrit Edi Rama.
Ai deklaron se kryeministrit Rama do t’i prezantojë projekte e rëndësishme që ka për zhvillimin e Mirditës.
“Motra dhe vëllezër Mirditorë, nga zemra dhe nga mendja, JU FALEMINDERIT për besimin tuaj! Jam i vetëdijshëm që pesha e kësaj detyre fisnike ka filluar pikërisht sot për mua.
Pushteti i Kryetarit të Bashkisë do të jetë në dispozicionin e secilit prej jush, në shërbimin tuaj, në mesin tuaj, çdo ditë të mandatit tim! Falenderoj z. Dedaj për urimet! Njerëzisht dhe profesionalisht i uroj suksese dhe mbarësi!
Rinovoj ftesën time ndaj Kryeministrit të Shqipërisë për një kafe në Rrëshen, si djalë i mirë e si Kryetar Bashkie i mirë, për projekte të rëndësishme që dua t’i paraqes sa më parë për zhvillimin e Mirditës. Faleminderit Mirditë! Së bashku, për ditë më të mira”, shkruan Melyshi.
Në lidhje me këtë, kryeministri Edi Rama u pyet nga gazetarët, por tha se nuk ka informacion për këtë ftese.
“Nuk jam dijeni të ftesës për kafe. Para se të vij aty kam shumë takime për të bërë. Kam Shkodrën, nesër do shkoj në një samit në Islandë. Sapo të kthehem do të nis me turin e falënderimeve nga Shkodra. Ku jam i vendosur për të bërë një histori të re”, tha Rama.