Gjykata e Posaçme kundër Korrupsionit dhe Krimit të Organizuar ka dënuar me 32 vite burg 2 të pandehurit për vrasjen e ish-policit Santiago Malko. Sot, GJKKO dënoi me 25 vite burg Ilir Selmanin, ndërsa 7 vite burgim u dënua Elvis Gaçaj.
Në gjyqin për vrasjen e ish-policit Santiago Malko, avokatët e vëllezërve Leonard dhe Elis Duka kërkuan pavlefshmërinë e akt-ekspertizës të bërë nga Prokuroria e Posaçme kundër Korrupsionit dhe Krimit të Organizuar (SPAK) për makinën e parë në pamjet filmike, targat e saj dhe personat që ishin brenda të cilat ishin përcaktuar. Për të provuar se nuk kanë lidhje në ngjarje, avokatët kanë depozituar një ekspertizë private, përmes të cilës pretendojnë, se materialet e përcaktuara nga hetimet e SPAK, nuk çojnë në identifikimin e llojit të makinës, të targës apo të personave që ndodheshin brenda mjetit. Duke pretenduar kështu se nuk kanë lidhje me ngjarjen.
Por përfundimet e arritura nga ekspertiza private u pa me rezerva nga prokurori Behar Dibra i cili pasi dëgjoi pretendimet e mbrojtjes së vëllezërve Duka, kërkoi nga GJKKO që të mos merret parasysh kjo kërkesë. Sipas tij duhej parë me dyshim se mbi çfarë momenti procedurial, është bërë ky akt-ekspertim privat që nxorri një përfundim të ndryshëm nga ekspertiza e bërë nga SPAK. Por jo vetëm prokurori nuk e priti mirë, pasi edhe familjarët e Santiago Malkos, e ëma dhe motra shkaktuan tensione në sallën e gjyqit.
Fillimisht e ëma kërkoi drejtësi, e për shkak të toneve të larta të familjares bënë që kjo e fundit të lërë sallën e gjyqit me vendim të trupës gjykuese. Në vend të saj, edhe e motra e viktimës pati ‘dy fjalë’ për t’u thënë togave të zeza: Po më detyroni të lë jetim edhe fëmijët e mi, siç i ka lënë vëllai im, nuk mund të bëhen hetime private!
Në fund të seancës, gjykata vendosi të pranojë kërkesën e prokurorisë për mospranimin e akt-ekspertizës private, duke vendosur edhe për dënimin e dy të akuzuarve. Më herët për vrasjen e ish-policit Malko është dënuar me 25 vite burg Blendi Teta, i cili akuzohet si një person që kishte mbajtur në vëzhgim lëvizjet e Malkos duke njoftuar edhe autorët për të kryer ekzekutimin. Ndërkohë Blendi Teta, i dënuar me 25 vite burg për të njëjtën ngjarje ka bërë rekurs vendimit te Gjykatës së Apelit, duke kundërshtuar vendimin e dhënë nga Apeli i SPAK. Teta u gjet fajtor nga trupa gjykuese si pjesëmarrës në ekzekutimin e Malkos mbrëmjen e 27 gushtit në rrugën “Xhanfize Keko” në Tiranë.
Për vrasjen e Malkos, prokuroria akuzon 8 persona, ku në krye të grupit janë dy vëllezërit Duka, Leonardi dhe Erlisi. Klani Duka, i akuzuar për vrasjen përbëhet nga: Leonard Duka, Erlis Duka, Ilir Selmani, Oltian Loga, Ervis Metani, Fatmir Hyseni, Dritan Agaj, Aleksandër Maxhaku dhe Xhoni Nica. Por, në pranga është vënë vetëm Teta dhe Ilir Selmani.