Gazetari Julian Kasapi i ftuar në studion e emisionit “Open” ka folur në lidhje me vrasjen e biznesmenit Ardian Nikulaj në Shëngjin dhe për detajet e zbuluara në lidhje me grupin që qëndron pas ekzekutimit të tij.
Kasapi deklaroi se dyshimet mbi shtetasit britanikë janë ngritur pasi një prej tyre, Steven Hunt, ka shkuar çdo ditë në hotel dhe e kryente pagesën çdo ditë që shkonte dhe jo duke rezervuar, gjë e pazakontë për një turist.
Sipas tij dyshime të tjera janë ngritur pasi ai ka vizituar disa zona të hotelit dhe ka qenë vazhdimisht duke i filmuar ato me aparatin celular.
Nga ana tjetër gazetarja Klodiana Lala zbuloi më tej se Nikulaj ishte një shënjestër tmerrësisht e vështirë për t’u arritur, pasi së fundmi ai kishte marrë dhe roje fizike të armatosur si edhe lëvizte me makinë të blinduar.
Ajo shtoi se rojet e Nikulajt nuk ndodheshin pranë tij në ditën që u vra pasi kanë qenë të angazhuar me fushatën politike në qytet në kaudër të zgjedhjeve të 14 majit.
Pjesë nga biseda:
Kasapi: Edmond Haxhia akuzohet pasi ka lidhje me fisin me të cilin viktima ka qenë në hasmëri. Në të vërtetë që në momentin që policia kishte dyshime për shtetasit britanikë, kanë shërbyer kamerat e sigurisë pasi ka një detaj të rëndësishëm pjesa e nëndheshme e hotel Koral, pasi aty ka disa ambiente. Britaniku Steven Hunt ka shkuar çdo ditë në hotel dhe nuk ka rezervuar më parë, por ka paguar çdo ditë për qëndrimin e tij
Kjo ndodhi çdo ditë deri në ditën e vrasjes dhe ngriti dyshime ndaj tij. Gjithashtu vajtja në disa zona të hotelit nga ai dhe filmimi i këtyre ambienteve kanë ngjallur dyshime. Kjo ishte pikënisja ku hetuesit nisën të dyshojnë mbi grupin e të huajve. Haxhia ka pasaportë angleze dhe i ka kontraktuar britanikët për vrasjen.
Lala: Ardian Nikulaj ishte një shënjestër tmerrësisht e vështirë për t’u arritur. Ai kishte marrë disa herë informacione që po paguheshin para për vrasjen e tij. E vetmja mundësi që ai të kapej ishte me shtetas të huaj pasi i konsideronte turistë. Ai kishte marrë dhe roje fizike të armatosur dhe mbante automjet të blinduar. I vetmi vend ku qëndronte i paarmatosur ishte ai vend. Prandaj i kanë marrë të huaj. të huajt nuk kanë gojë të flasin, nuk flasin më pas, etj.