Enea Themollari, 29 vjeç, ka ndërruar jetë pas një beteje të gjatë me plagët e marra nga shpërthimi i tritolit në derën e banesës së tij. Ai ishte në spital që nga 14 korriku, pas incidentit tragjik që ndodhi në apartamentin e fqinjeve të tij, motrave Nikolli.
Ngjarja ka ndodhur në Elbasan, ku tritoli shpërtheu në shtëpinë e Aldës dhe Xhovana Nikolli, të cilat akuzojnë Nuredin Dumanin si autorin e vendosjes së eksplozivit. Dumani, i arrestuar dy vite më parë në Fier, është në qendër të akuzave të vazhdueshme nga vajzat, veçanërisht nga Xhovana, e cila ka shprehur zemërim dhe kërcënime ndaj tij në rrjetet sociale.
Postimet e saj në TikTok përmbajnë deklarata të forta, ku ajo e akuzon Dumanin për shpërthimin dhe shpreh gatishmërinë për të mos u dorëzuar. “Nuk është burrni të merresh me femra,” shkruante ajo në një nga postimet.
Shpërthimi, që ka lënë pas një tragjedi të rëndë, ka shkaktuar plagosjen e Enea Themollarit, i cili ishte krejtësisht i pafajshëm në këtë histori. Ai u zgjua nga zhurmat e shpërthimit, por dera e banesës e zuri poshtë dhe pas tre muajsh përpjekjesh për t’u rikuperuar, ai ndërron jetë.
Alda Nikolli kishte deklaruar se kishte pasur një lidhje me Dumanin, duke thënë se ata kishin komunikim të vazhdueshëm përmes Skype, dhe se shpërthimi ishte një hakmarrje për dëshminë e saj në SPAK.
Aktualisht, autoritetet po hetojnë rrethanat e plota të ngjarjes dhe identitetin e plotë të autorëve.