SPAK ka mbyllur hetimet për dosjen “Partizani” ku i përfshirë ishte dhe ish-kryeministri Sali Berisha.
Avokatia e Sali Berishën Klodiana Gjyzari është paraqitur paraditen e sotme në ambientet e Prokurorisë së Posaçme për të firmosur mbylljen e hetimeve dhe për të tërhequr vendimin.
E pyetur nga gazetarja e Top Channel Anila Hoxha, ajo konfirmoi se mori dosjen për Sali Berishën.
Më 11 shtator të këtij viti, SPAK ka mbyllur hetimet dhe ka njoftuar akuzat për Berishën, dhëndrin e tij Jamarbër Malltezi, të akuzuar për korrupsion lidhur me dosjen e ish-kompleksit Partizani.
Berisha është në hetim për veprën penale të “korrupsionit pasiv” së bashku me Malltezin, i cili akuzohet se ka përfituar të ardhura në vlerën e 5.4 milionë eurove nga një biznes ndërtimi në mënyrë të parregullt falë vendimeve të qeverisë të marra nga vjehrri i tij. Berisha dhe Malltezi i kanë kundërshtuar akuzat dhe e kanë cilësuar hetimin si të orkestruar nga kryeministri Edi Rama.